A portavoz nacional do BNG, Ana Pontón, fixo este sábado un chamamento á mobilización cidadá de cara á manifestación convocada por SOS Sanidade Pública este domingo en Santiago de Compostela, alertando de que o actual modelo de xestión sanitaria da Xunta representa un risco para a saúde da poboación.
Durante a súa intervención na xornada conmemorativa dos 50 anos da AN-PG, Pontón declarou que “temos que mobilizarnos para defender unha das grandes conquistas sociais, a sanidade pública, que leva 16 anos sufrindo recortes e procesos de privatización”. Neste sentido, subliñou que “ao final quen a paga é a cidadanía”.
A líder nacionalista denunciou que a situación actual do Servizo Galego de Saúde (Sergas) mostra síntomas preocupantes como “listas de espera inasumibles”, a existencia de “11.000 nenos e nenas sen pediatra” e demoras hospitalarias superiores ás rexistradas antes da pandemia da covid. Segundo Pontón, todo isto responde a unha estratexia do PP para “deteriorar o público e beneficiar o privado”.
A manifestación prevista para este domingo en Compostela forma parte dunha serie de protestas organizadas en distintos puntos de Galicia co obxectivo de visibilizar o malestar social ante o funcionamento do sistema sanitario. Pontón sinalou que “é fundamental que haxa unha gran resposta social que diga alto e claro que a sanidade pública non se toca”.
Ao ser preguntada polos casos de agresións a persoal sanitario, que nos últimos meses xeraron preocupación tanto no sector como na opinión pública, a portavoz do BNG manifestou que moitos dos profesionais apuntan directamente á falta de recursos e ao colapso asistencial como orixe de boa parte do malestar. “Hai unha desesperación crecente entre a cidadanía cando acode ao Sergas e se atopa con esperas que nalgúns casos superan o ano”, asegurou.
Pontón tamén criticou a actitude do goberno galego, que ao seu xuízo nega sistematicamente que os recortes teñan consecuencias reais sobre a saúde da poboación. “O único que temos son anuncios sen verificar e un negacionismo que ignora o impacto das súas políticas”, concluíu.
A manifestación convocada por SOS Sanidade Pública partirá do Campus Sur de Santiago e está prevista unha ampla participación de colectivos sociais, profesionais sanitarios e organizacións políticas e sindicais.
