A secretaria xeral do PPdeG, Paula Prado, cargou este xoves contra a alcaldesa de Santiago, a nacionalista Goretti Sanmartín, pola súa carta aberta á cidadanía na que botaba en cara ao presidente da Xunta, Alfonso Rueda, o “desprezo” do Executivo cara á capital galega. “As palabras que utiliza a alcaldesa non son as adecuadas dunha representante da cidade, senón máis ben dunha afiliada radical do BNG que voou calquera ponte coa Xunta”, advertiu, en rolda de prensa, antes de incidir na relevancia de que o Concello e o Goberno galega teñan “unha boa sintonía”.
Ao seu xuízo, o que se ve en Santiago é unha alcaldesa que “exerce de militante radical do BNG”, á que instou, ademais, a que “no canto de fixarse nos investimentos” que o Executivo galego fai “noutras cidades” observe “a execución dos seus orzamentos”. Prado, quen secundou a carta que, nesa mesma xornada, fixo pública o líder do PP local, Borja Verea, insistiu en que Sanmartín “dinamita” a relación coa Xunta. “Iniciou a voadura”, avisou e, tras remarcar que ela mesma é compostelá, agregou que non sente “representada nesas palabras”.
“Por tanto, pídolle ‘sentidiño’ e mesura’ á hora de facer declaracións institucionais. Se quere falar como militante radical do Bloque estamos noutro terreo, pero os santiagueses non merecemos a unha alcaldesa que desprece á Xunta, que tantos investimentos fixo en Santiago”, esgrimiu.
