A portavoz do Goberno municipal de Santiago, Míriam Louzao, descartou que a saída do grupo socialista dos edís expulsados Gonzalo Muíños, Mercedes Rosón, Mila Castro e Marta Álvarez, se vaia a facer efectiva no próximo pleno de marzo, xa que no Concello “non se recibiu comunicación oficial”. Así o confirmou Louzao tras a rolda de prensa ofrecida este luns para dar conta dos asuntos aprobados pola Xunta de Goberno local.
Segundo explicou, unha vez se reciba no Concello a comunicación oficial por parte do partido, o secretario daralle trámite de audiencia, que ten un prazo mínimo de 10 días hábiles. “Por tanto, a este pleno de marzo, é imposible que chegue”, asegurou. Descartou ademais que se vaia a celebrar un pleno extraordinario para o procedemento. Así mesmo, defendeu o traballo do goberno municipal fronte ás críticas vertidas este fin de semana por parte do secretario xeral do PSdeG, José Ramón Besteiro, que aseguraba que o Executivo compostelán avanzaba “ao ralentí”.
Precisamente as accións aprobadas na Xunta de Goberno, dixo Louzao, “desmenten” o afirmado polo líder socialista. “Estamos a traballar con normalidade, adxudicando contratos, facendo obras e pondo cuestións en marcha”, insistiu. “Entendemos que o señor Besteiro ten que facer declaracións neste sentido e respectámolo. O partido socialista está na oposición, ten que facer declaracións nese sentido, e nós estamos no goberno, temos que seguir traballando por esta cidade”, concluíu.
