O PSOE vén de confirmar a expulsión definitiva do Grupo Municipal Socialista de Santiago de Compostela dos edís Gonzalo Muíños, Mercedes Rosón, Mila Castro e Marta Álvarez. A medida chega tras a resolución da Comisión Federal de Ética e Garantías, que ratificou as sancións impostas pola dirección do partido.
Segundo fontes consultadas, a expulsión de Mila Castro, Mercedes Rosón e Marta Álvarez fíxose firme despois de que non acudisen á convocatoria na que se debía designar a Gumersindo Guinarte como portavoz do grupo municipal, en substitución de Gonzalo Muíños. No caso deste último, tamén se confirmou a súa suspensión de militancia por “indisciplina reiterada”, derivada dun conflito coa agrupación local, dirixida por Aitor Bouza.
OS CONCELLEIROS ANUNCIAN ACCIÓNS LEGAIS
Nun comunicado, os edís expulsados reafirmaron a súa vinculación co socialismo, asegurando que “non hai resolución nin decisión de organización que poida cambiar iso”. Así mesmo, criticaron a existencia de “informacións falsas” sobre a súa situación e denunciaron que foron acusados de incumprir as normas internas do partido.
Por este motivo, anunciaron que levarán o caso ante a xustiza ordinaria, tanto pola vía civil como penal. Segundo afirman, buscan “defender a verdade e a súa integridade”, e evitar que “se decida de forma arbitraria quen pode ou non ser socialista en función de preferencias persoais”.
CRÍTICAS Á URXENCIA DO PROCESO
Os concelleiros tamén expresaron o seu malestar polo que consideran unha tramitación acelerada da súa expulsión. Destacaron que a ratificación se realizou cun procedemento extraordinario no que só participaron dous membros da Comisión Federal de Ética e Garantías.
Neste sentido, criticaron que “non se aprecia a mesma urxencia” noutros expedientes internos do partido en Galicia e no resto de España, especialmente en casos relacionados con mocións de censura ou presuntos episodios de corrupción.
Por último, os edís reiteraron o seu compromiso con Santiago e aseguraron que seguirán desempeñando as súas funcións ata 2027, en cumprimento do mandato recibido dos seus votantes. Tamén destacaron o apoio de máis de 800 persoas, que subscribiron unha carta en defensa da súa continuidade.
