O presidente de Mercasa, José Miñones, participou este domingo no XV Congreso do PSdeG, onde aproveitou para felicitar a José Ramón Gómez Besteiro pola súa elección ao fronte da nova Executiva socialista. No acto, Miñones deixou clara a súa postura respecto a unha posible candidatura á alcaldía de Santiago de Compostela, descartando esta opción e reafirmando o seu compromiso coa súa actual responsabilidade na empresa pública.
“Cando estou nun sitio estou ao 100% e, por tanto, agora mesmo dedícome ao 100% no que é levar esta empresa pública, que é onde vou seguir estando ao longo destes anos”, explicou Miñones.
Durante o evento, o presidente de Mercasa tamén foi preguntado pola situación do PSOE compostelán, un asunto que, como compostelán, vive de cerca. “Doeme moito a situación, porque ademais, como compostelán, coñezo a todas as partes e, por tanto, dame pena que a situación sexa esa”, comentou. Ademais, fixo fincapé na importancia de cumprir coas bases do partido: “Tamén estou totalmente de acordo con que hai que cumprir as bases”.
O Congreso do PSdeG, que reuniu a numerosos representantes socialistas de toda Galicia, serviu de escaparate para a renovación do partido e para a definición das liñas estratéxicas de cara aos próximos procesos electorais. A posición de Miñones mantense firme dentro da súa xestión en Mercasa, sen aspiracións a novos cargos políticos a curto prazo en Santiago de Compostela.
