O Diario Oficial de Galicia publicou este luns o anuncio relativo á expropiación forzosa de terreos para a construción da senda peonil que unirá Santiago de Compostela co Milladoiro. En concreto, a medida afecta o tramo comprendido entre a estación intermodal e a zona de San Caetano.
A publicación desta notificación por parte da Axencia Galega de Infraestruturas responde á imposibilidade de localizar aos titulares dos terreos afectados para efectuar as comunicacións expropiatorias no municipio de Santiago. O aviso está dirixido aos herdeiros de Florinda Sende Neiro e a Josefa García Elizagaray, despois de varios intentos infrutuosos de notificar a expropiación e ante a falta de información sobre o seu domicilio actual.
As persoas interesadas terán un prazo de dez días a partir do martes, 18 de febreiro, para presentarse nas oficinas do Servizo Provincial da Coruña da Axencia Galega de Infraestruturas, onde poderán recibir máis información sobre o proceso.
O tramo de senda que se vai desenvolver terá unha lonxitude de 5,9 quilómetros e formará parte dun eixo de mobilidade sustentable, facilitando a conexión peonil entre Santiago e O Milladoiro. Con esta intervención, a Administración busca mellorar as infraestruturas para a circulación de peóns e fomentar o uso de medios de transporte máis sostibles.
