A xunta de goberno local do Concello de Santiago acordou este luns denegar a ‘Arqura Homes’, Fondo de Activos Bancarios, a licenza de obra nova para a construción de dúas edificacións nas parcelas do antigo Peleteiro, no Ensanche compostelán.

En rolda de prensa, o edil de Urbanismo, Iago Lestegás, detallou que a denegación por parte municipal vén motivada porque o proxecto incumpre as Normas de Habitabilidade de Galicia no que se refire a os servizos das vivendas, en concreto no relacionado á disposición de espazos de almacenaxe, e porque omite o proxecto de urbanización do espazo libre público.

“Así se lle comunicou á propiedade formalmente ata en tres ocasións antes de proceder á denegación da licenza de obra”, insistiu. Segundo explicou, o plan PERI-12, aprobado en 2005, que o proxecto presentado executa, permite simultanear as obras de urbanización e as de edificación.

Así, as de urbanización consisten fundamentalmente na apertura dunha nova rúa de trazado curvo que conectaría San Pedro de Mezonzo e República Arxentina e que serviría de soporte ás novas edificacións.

Con todo, sostivo o Executivo municipal, o plan de etapas do PERI-12 establece a necesidade de aprobar un proxecto de urbanización, que debe tramitarse de acordo co procedemento correspondente e por tanto debe ser sometido a información pública durante un prazo mínimo dun mes, xa que “o dereito de participación da cidadanía no procedemento de execución do plan ten carácter esencial”..