A Fiscalía Europea Anticorrupción notificou a Ecoloxistas en Acción, tal e como eles mesmos informaron, a súa decisión de reclamar as dilixencias do Xulgado de Instrución nº2 de Santiago relativas á investigación sobre os posibles delitos de fraude de subvencións e falsidade documental polo ‘eixo de mobilidade’ promovido pola Xunta de Galicia no Bosque do Banquete de Conxo. A organización ecoloxista denunciara a principios de verán ante a Fiscalía europea anticorrupción, ao Goberno galego pola talla de árbores, movementos de terras e a apertura dun viario dentro dunha área de Protección de Patrimonio da Humanidade do Convento de Conxo.
Aseguraban ademais que a actuación da Administración autonómica invadía a área delimitada na que se realiza o proxecto ‘Eco-Bosque Río Sar’, promovido polo Concello de Santiago de Compostela co apoio da Fundación Biodiversidade do Ministerio para a Transición Ecolóxica e o Reto Demográfico (MITERD). O proxecto está financiado tamén, lembran, dentro do Plan de Recuperación, Transformación e Resiliencia da Unión Europea e promove a recuperación ambiental do ecosistema fluvial do ‘Bosque do Banquete de Conxo’, rexenerando as marxes do río, eliminando especies invasoras e restaurando espazos que aumenten a biodiversidade da zona.
Por iso, Ecoloxistas en Acción entendía que a Consellería de Infraestruturas e Mobilidade da Xunta “incumpría os principios de boa xestión financeira que deben rexer o destino dos fondos europeos, ao sepultar coa súa actuación un proxecto posto en marcha con anterioridade”. “O acto administrativo de ordenar o inicio das obras a propósito de que se aparta do esixido por Patrimonio podería ser constitutivo dun delito de prevaricación administrativa. Ademais de comportar a perpetración dun delito contra o patrimonio histórico, artístico, cultural e monumental, especificamente contra o patrimonio da humanidade”, denunciou o portavoz de Ecoloxistas en Acción, Cristóbal López.
Ecoloxistas en Acción confirmou que se personará nas dilixencias abertas pola fiscalía para instar a que se decrete a paralización cautelar das obras, “para evitar así danos irreparables ao ecosistema do río Sar”. Pola súa banda, a asociación veciñal Conxo Aberto, tras reunirse co director xeral da Axencia Xeral de Infraestruturas da Xunta de Galicia, lamentou que o Goberno galego se negue a buscar unha variante do trazado que “realmente evite” a afección ao bosque do río Sar e á contorna do Mosteiro de Conxo.
Ambas as organizacións coinciden en asegurar que a última proposta de trazado da Xunta é “unha burla á cidadanía, xa que non evita os impactos ambientais máis graves”. “As obras do proxecto ‘Eixo de Mobilidade Sostible’ no tramo de Milladoiro a Compostela ao seu paso por Conxo seguen sendo unha urbanización dura dun espazo de alto valor natural, xa que teñen previsto hormigonar, levantar vertedoiros, asfaltar e iluminar nas marxes do río Sar”, explicou o portavoz de Conxo Aberto, Luciano Villar.
VARIACIÓNS NO EIXO DE MOBILIDADE PARA AFASTARSE DE CONXO
Hai xusto unha semana, o director da Axencia Galega de Infraestruturas, Francisco Menéndez, presentaba a modificación do Eixo de Mobilidade entre Milladoiro e San Caetano, que se afasta agora da zona do Banquete de Conxo tras as queixas veciñais. Alí, insistiu en que se executan variacións en aras do “consenso” e non porque o proxecto non fose “completamente viable” e “respectuoso” coa contorna e coa iniciativa de restauración exposta para a zona de Conxo polo Concello de Santiago.
Agora aproveita as plataformas existentes do aparcadoiro do Hospital de Conxo (asegurou que isto non afectará ao número de prazas, que se reordenan e mesmo se consegue unha maior eficiencia) para afastarse da zona do Banquete e eliminar tamén desta forma as cruces polo río Sar. Sáese así completamente do Plan Especial de Conxo e dá continuidade ao espazo ciclista pola zona e aos peóns polas sendas xa existentes. Nesa mesma rolda de prensa, e respecto das dilixencias abertas por un Xulgado de Santiago e a Fiscalía Europea sobre a denuncia de Ecoloxistas en Acción, Menéndez mostraba a súa tranquilidade.
“De forma técnica e apaixonada, consideramos que é unha boa solución da que sentirse orgullosos (…) Temos solicitudes de información. O proxecto está correctamente tramitado. Que haxa unha parte da poboación á que non lle guste é unha cousa, e que haxa un problema xudicial, outro”, asegurou. Así mesmo, puntualizou que é “evidente” que durante a execución das obras hai a “necesidade” de abrir unha plataforma para despois executala, “pero o resultado final non ten nada que ver co momento de execución das obras”.
