O líder do Partido Popular de Santiago, Borja Verea, destacou este mércores a importancia do traballo que o seu partido está a realizar para impulsar proxectos clave na cidade, entre eles as vivendas colaborativas e o ‘cohousing’, que a Xunta desenvolverá na Avenida de Xoán XXIII. “O PP volve demostrar quen está a traballar, quen está a facer cousas e quen está a pór ganas e decisión”, sinalou Verea.
Verea lembrou que esta iniciativa formaba parte do seu programa de goberno nas pasadas eleccións municipais e que o seu partido tamén promoveu varias propostas no pleno para apostar por modelos de vivenda colaborativa destinados á mocidade, á terceira idade e a opcións interxeracionais.
“Estamos contentos de ser útiles desde a oposición, de marcar a axenda e de estar sempre por diante deste goberno decepcionante do BNG”, afirmou Verea. Ademais, engadiu que os cidadáns son conscientes de que “as principais propostas en marcha en Compostela a día de hoxe débense á nosa iniciativa, pulo e enerxía”.
Como exemplos, mencionou outros proxectos que o PP está a impulsar, como a senda peonil que conectará Milladoiro con Santiago e o proxecto de aparcadoiro para o Hospital Clínico, reafirmando o compromiso do seu partido en mellorar a calidade de vida na cidade.
