Representantes de distintos sindicatos e colectivos prol Palestina expuxeron os detalles da folga convocada para o vindeiro venres 27 de setembro e das actividades que se celebrarán en Compostela. Así, anunciaron unha manifestación que sairá ás 12:00 horas desde a Praza Roja e unha concentración na Praza do Obradoiro que comezará ás 19:00 horas.
Neste sentido, Rocío Ponche de CXT lembrou nunha rolda de prensa celebrada este mércores en Santiago que, “todas as persoas traballadoras de todos os sectores están cubertas” pola folga xeral e animou á cidadanía a participar.
Pola súa banda, o Sindicato de Estudantes tamén subliñou que o seu colectivo da cobertura á Educación Secundaria Obrigatoria (ESO), Bacharelato, Formación Profesional (FP), Conservatorios e Escolas de Idiomas Oficiais para que poidan secundar o paro.
Deste xeito, o sindicato animou a todos os estudantes e ao profesorado a unirse á manifestación para “acabar co xenocidio” en Palestina e esixir a “ruptura inmediata de calquera relación co Estado xenocida de Israel”.
Así mesmo, a Rede Galega pola Palestina esgrimiu que tanto a folga xeral como as actividades que se desenvolverán en Compostela forman parte de “un esforzo global para visibilizar a loita do pobo palestino e denunciar a represión que sofre no seu territorio”.
DENUNCIAN O “APARTHEID” E O “COLONIALISMO”
Tamén durante a rolda de prensa, na que participaron membros da Asemblea Internacionalista de Compostela, CXT, CNT, Rede Galega pola Palestina, Sindicato de Estudantes e Solidariedade Obreira, un dos representantes da Rede Galega pola Palestina esixiu o fin “do bloqueo, do apartheid, da ocupación, do colonialismo e do xenocidio sionista”.
Nesta liña, defendeu o “dereito de retorno” das persoas palestinas refuxiadas, así como de autodeterminación e de resistencia do pobo palestino “en todas as súas formas”. Outra das demandas do colectivos prol Palestina presentes na rolda de prensa foi a ruptura de relacións diplomáticas con Israel e a suspensión de acordos comerciais e académicos que o “benefician”. Con todo, fixeron fincapé na importancia que ten a mobilización da clase traballadora galega e incidiron en que o seu obxectivo é intensificar a resposta social en Galicia.
