Un grupo de pais e nais de alumnos do CEIP Lamas de Abade conseguiu xa máis de 400 firmas das familias para que o centro, que conta cuns 520 nenos, para que o centro abandone ‘E-Dixgal’, o programa do libro dixital da Xunta.
O escrito denuncia que nos cursos onde funciona ‘E-Dixgal’, 5º e 6º de Educación primaria, ofrécese un ensino “completamente dixital”, onde os alumnos empregan computadores portátiles “ao redor de cinco horas diarias” máis as que empregan para facer os deberes en casa.
Gustavo Sende, pai e representante das familias no consello escolar, explica que a iniciativa naceu porque ven que os alumnos que pasaron á ESO no IES Lamas de Abade, que non emprega o libro dixital, “están a quedarse atrás” con respecto aos que proveñen doutros colexios.
“Entendemos que son nenos moi pequenos para ter as pantallas en clase”, asevera Sende, quen tamén cualifica de “contraditorio” o emprego de ‘E-Dixgal’ cando “desde a propia Consellería de Educación dise que van eliminar os móbiles” en todo o horario lectivo. A todo isto suma que “houbo profesores que ‘colleron’ a nenos xogando nos computadores e en páxinas pornográficas”.
O programa do libro electrónico é voluntario e a adhesión ou non dun centro decídeo o seu claustro. O próximo curso haberá un total de 613 centros galegos que o empreguen, 17 menos que o ano anterior ao retirarse 23 e sumarse só seis.
