Dende mediados de maio, a Facultade de Historia da USC convértese no escenario dunha acampada estudantil en defensa do pobo palestino, que criticou duramente a dirección da USC e o decanato por unha suposta actitude “hostil”. Segundo os participantes, que oscilan entre “70 e 80 persoas” de forma permanente, a universidade trata de “desprestixiar” a súa acción con “mentiras” nos medios e “presións” sobre os integrantes.
Nunha comparecencia ante os medios realizada esta mañá, os manifestantes anuncian que están citados para unha reunión con Antonio López, reitor da USC, á cal lle trasladarán un manifesto de 17 puntos. Entre as demandas, destaca a petición para que a universidade rompa relacións con empresas e entidades que apoiaron “o xenocidio” do pobo palestino, e a visibilización da denuncia deste xenocidio nos edificios oficiais da USC.
Os acampados acusan á dirección da USC de complicidade co sionismo e de iniciar unha “campaña de desprestixio” na comunidade universitaria para desacreditar a voz da protesta. Reclaman o fin da “hipocrisía” da institución e a adopción de medidas concretas, afirmando que non están dispostos a negociar e que outras universidades, como a Universitat de Barcelona, xa asumiron compromisos similares.
Ademais, criticaron aos “políticos profesionais” por tratar de cooptar os movementos de base e pretender dirixir a protesta mentres forman parte da “armazón burocrática europea que participa do xenocidio”. Após a reunión co reitorado, decidirán en asemblea os seguintes pasos a seguir, mentres continúan cunha campaña de recollida de firmas en apoio á súa causa.
