Un grupo dunhas trinta persoas arroupou este luns nos xulgados de Santiago ao home multado por solicitar ser atendido en galego nun ambulatorio de Rianxo, unha sanción recorrida pola vía xudicial e que, para A Mesa pola Normalización Lingüística, exemplifica a “clara conivencia” entre a Xunta e o Estado para “negar sistematicamente” o dereito a comunicarse coa administración na lingua propia de Galicia e “amedrentar” a quen demanda o cumprimento dos seus dereitos lingüísticos.
Os xulgados da capital galega celebraron este luns a vista xudicial polo recurso presentado por Xosé Agrelo contra a multa de 600 euros que lle foi imposta por demandar nun centro de saúde de Rianxo que se lle atendese en galego durante un cribado de covid-19.
A sanción chega aos xulgados despois de esgotar a vía administrativa, na que a Subdelegación do Goberno alegou que a multa —xa abonada, pero que a defensa (custeada pola Mesa) pide que sexa revogada— respondía a un asunto de “orde pública” denunciado pola Policía Local e que, por tanto, estaba desvinculado de calquera cuestión lingüística.
Antes de entrar á vista, Agrelo agradeceu o apoio das persoas convocadas pola Mesa pola Normalización Lingüística, cuxo presidente, Marcos Maceira, denunciou ante os medios que no caso de Rianxo “conflúen” a “negativa” das administracións a velar polos dereitos lingüísticos da cidadanía e a “actitude” de Xunta e Estado de “amedrentar” ás persoas “que queren usar o galego nos servizos públicos”.
Maceira asegurou que a Xunta “aínda segue negando a través dos funcionarios o dereito a usar o galego na propia administración autonómica”, ao que se suma a “clara connivencia” que, di, existe entre o Goberno galego e o central para “presionar” ás persoas que esixen “con toda a dignidade” o cumprimento das normativas que amparan o dereito de ser atendidos en galego polos funcionarios.
“Non imos consentir todo isto. ▶️Poden ir tomando nota o señor Rueda, o conselleiro de Cultura e Lingua, o delegado do Goberno e o ministro do Interior“, aseverou o presidente da Mesa, subliñando o compromiso de “resposta” ante “todos os casos que haxa de represión en pleno ano 2024 polo simple feito de usar o galego”.
Maceira tamén sinalou que “recentemente” se produciu outro caso dunha persoa que “tivo un incidente” na comisaría de Policía de Pontevedra por cuestións lingüísticas e que en xullo terá lugar un xuízo pola vía penal en Ourense contra un grupo de persoas “acusadas de defender a normativa vixente en relación á toponimia”.
“Temos unha lingua propia e queremos vivir nela. Este é un dereito humano recoñecido a todos os niveis, que o Estado Español e a Xunta de Galicia deben garantir sempre e en todo lugar”, concluíu Maceira.
