Os estudantes acampados na Facultade de Xeografía e Historia de Santiago de Compostela en protesta pola guerra en Gaza realizaron este venres unha intervención pública para criticar que o decanato os desaloxase dunha das aulas que estaban a utilizar e que estea a difundir que non haberá espazos para realizar os controis da próxima semana, considerando que a USC busca “deixalos como inimigos ante o estudantado” cando a Asemblea ten “o compromiso unánime de non dificultar nin boicotear os exames”.
A ocupación de espazos nesta facultade, que se iniciou hai 10 días, obrigou a recolocar noutros centros da Universidade, como Filosofía e Medicina, a celebración dos exames e outras actividades. O movemento recibiu o apoio do decano, que lle cedeu espazos a condición de que a protesta fose “compatible coa marcha relativamente ordinaria” da facultade.
As tendas e os obxectos persoais dos mozos ocupan espazos tanto da primeira como da segunda planta e, desde o luns 20 estendéronse a máis aulas (a 5 e a 8). Nesta situación, o decano da facultade enviou estes días un correo electrónico, ao que tivo acceso Europa Press, no que recoñecía que non ten “garantía de situar todos os exames da semana próxima” noutros espazos universitarios, o cal podería afectar o calendario, segundo fontes consultadas.
NOVOS ESPAZOS
Os membros da acampada confirmaron este venres que foran “desaloxados” da aula 8, cuxa “ocupación fora comunicada pola asemblea a noite anterior” para “paliar as necesidades de cara a crear novos espazos para garantir a integridade física e mental” dos participantes. “Non ocupamos estas aulas por capricho, se non pola necesidade dun ‘punto lila’ e dunha zona de baixa estimulación”, dixo Paula, unha das portavoces dos estudantes.
A negativa a usar estas aulas, engadiron, prodúcese a pesar de que “todos os exames previstos nesta facultade foron realizados sen trabas por parte da asemblea, sendo o maior contratempo un atraso de dous minutos”. Os mozos aseguran que teñen o compromiso “de non dificultar nin boicotear os controis” e acusan á USC de “tentar deixalos como inimigos ante o estudantado”, incluso “comparando frívolamente a ocupación de espazos que necesitamos da facultade coa ocupación sionista en Gaza”.
SEN “MEDIAS TINTAS”
A continuación, as portavoces leron un manifesto da Asemblea no que reclaman que todas as institucións españolas s “impliquen nas demandas históricas do pobo palestino”.
Dentro das institucións que sinalaron está a USC, que “colabora en trece proxectos de investigación e en sete publicacións científicas conxuntas con universidades israelís” e que “lle concedeu un premio á filósofa sionista Marta Nussbaum”.
Con todo, a USC xa anunciou que rompería as relacións cos centros académicos de Israel.
