O grupo de sete activistas galegos que participaba na misión internacional da ‘Global Sumud Flotilla’ regresou na noite deste sábado a Santiago de Compostela, onde foi recibido por decenas de persoas na estación intermodal entre aplausos, bandeiras palestinas e consignas de apoio á poboación de Gaza. A chegada produciuse arredor das 22:45, con preto de media hora de atraso respecto ao horario inicialmente previsto.
A delegación galega estaba integrada por Sandra Garrido, Alberte Pagán, Ana Fontes, Andrea Morais, Benito González, Duarte Ferrín e Xurxo Porritt, que viaxaban nunha iniciativa internacional organizada para intentar romper o bloqueo humanitario sobre Gaza. Os participantes foran interceptados por Israel a comezos desta semana mentres navegaban polo Mediterráneo e posteriormente deportados a Turquía, desde onde iniciaron a súa viaxe de regreso.
Na estación compostelá, varias persoas agardaban xa desde antes das 22:00 a chegada do grupo. O recibimento estivo marcado pola presenza de bandeiras palestinas, pancartas con lemas como “Palestina libre” e participantes que portaban kufiyas, nunha convocatoria de apoio aos activistas e á causa palestina.
Tras os primeiros reencontros e abrazos, Sandra Garrido tomou a palabra para agradecer o apoio recibido durante os últimos días e reivindicar a continuidade das accións de solidariedade. “Non nos van a parar. Vai haber outra flotilla”, afirmou diante das persoas asistentes.
A activista tamén fixo referencia ao percorrido do regreso desde Turquía e relatou o sucedido durante unha primeira parada en Bilbao, onde parte do grupo desembarcou antes de continuar cara a Galicia. Segundo explicou, no recibimento producido na cidade vasca producíronse intervencións policiais. “Alí houbo un recibimento como este, houbo unha carga policial brutal e parecía que volviamos a Israel”, sinalou.
Durante a súa intervención, Garrido considerou que a misión desenvolvida pola flotilla acadou os seus obxectivos, ao entender que contribuíu a aumentar a atención pública sobre a situación en Gaza. A activista lembrou que xa se producira unha primeira interceptación a finais de abril, tras a que parte dos participantes decidiron continuar a travesía.
Así mesmo, referiuse aos episodios vividos durante a última semana e ás denuncias realizadas por diferentes integrantes da expedición internacional sobre o trato recibido tras a interceptación. Aínda así, subliñou que as situacións relatadas polos participantes non son comparables co contexto que sofre a poboación palestina. “Non é a mínima parte do que están a sufrir” os propios palestinos, afirmou.
