A delegación galega da flotilla internacional que se dirixía cara Gaza regresará este sábado a Santiago de Compostela despois de varios días marcados pola retención do grupo por parte das autoridades israelís no Mediterráneo e a posterior deportación a Turquía. A chegada á capital galega está prevista para as 22:00 na Estación Intermodal.
Segundo confirmou a organización Global Sumud Flotilla, o retorno produciuse tras unha xornada dedicada a tarefas de documentación e atención sanitaria ás persoas participantes. Os activistas partirán desde Istambul xunto ao resto da delegación española rumbo a Madrid e, desde alí, continuarán a viaxe en tren ata Compostela.
Os sete integrantes galegos son Sandra Garrido, Alberte Pagán, Ana Fontes, Andrea Morais, Benito González, Duarte Ferrín e Xurxo Porritt. A delegación galega de apoio aos participantes sinalou que todos eles se atopan “ben de saúde”, aínda que o Ministerio de Asuntos Exteriores confirmou que catro dos máis de corenta integrantes españois da expedición precisaron asistencia sanitaria tras a súa chegada a Turquía.
No comunicado difundido pola organización, Global Sumud Flotilla asegura estar a recompilar información sobre o trato recibido polos participantes durante a súa retención. O colectivo denuncia a existencia de “numerosos abusos, torturas e violencia extrema”, e engade que algúns dos casos considerados máis graves necesitaron atención médica especializada na capital turca.
Os relatos facilitados por activistas españois apuntan a episodios de privación do sono, golpes, utilización de táseres e inmobilización con bridas que lles provocaban perda de sensibilidade nas mans. Ademais, días atrás, o equipo xurídico de Adalah, encargado da asistencia legal ao grupo, xa trasladara denuncias por “violencia extrema”, facendo referencia tamén a situacións de “acoso sexual e humillación”.
