Un colectivo de mozos okupou nos últimos días un inmoble situado no número 2 da rúa García Blanco de Santiago de Compostela. A Policía Nacional confirmou ter constancia da okupación, a través da denuncia do propietario do inmoble, que se sitúa próximo á sala Capitol.
Baixo o nome ‘Miñoca’, o colectivo presentouse en redes sociais como un novo espazo autogestionado que “se abre coa vontade de servir tanto aos movementos sociais e de clase como aos veciños”. Así mesmo, anunciaron unha xornada de traballo aberta para colaborar na limpeza do espazo e achegar mobles ou decoración para o mesmo, este xoves ás 17.00 horas.
O CONCELLO CONFIRMA A IDENTIFICACIÓN DE DÚAS PERSOAS POR PARTE DA POLICÍA LOCAL
A preguntas dos medios na rolda de prensa posterior á Xunta de Goberno Local deste pasado luns, a portavoz municipal, Míriam Louzao, explicou que a Policía Local identificou a dúas persoas relacionadas coa okupación do edificio da rúa García Blanco, aínda que precisou que as actuacións e dilixencias abertas sobre este asunto están sendo desenvolvidas pola Policía Nacional.
Louzao indicou que o Concello mantén unha coordinación habitual co corpo estatal, pero asegurou que o goberno local non dispón de máis información sobre a investigación aberta. A portavoz sinalou tamén que as identificacións se produciron “nos últimos días”, aínda que non concretou a data exacta.
