Miles de docentes e estudantes percorreron este martes o centro de Santiago de Compostela nunha nova xornada de mobilización en defensa do ensino público galego, convocada por CIG e STEG no marco da sexta folga educativa deste curso. Segundo os organizadores, arredor de 5.000 persoas participaron nunha marcha que partiu da Alameda ás 12:20 e concluíu fronte á sede da Xunta de Galicia, onde se deu lectura a un manifesto colectivo para reclamar melloras laborais e un proceso de negociación efectivo coa Administración autonómica.
Baixo a pancarta ‘Loitando construímos ou ensino público galego’, o percorrido estivo acompañado por consignas en defensa da calidade do ensino público, críticas á carga burocrática e reivindicacións de recuperación de dereitos laborais. Á convocatoria sumáronse tamén estudantes chamados polo Sindicato de Estudantes da Galiza.
Antes do inicio da marcha, a secretaria nacional de CIG-Ensino, Laura Arroxo, manifestou o malestar do colectivo pola falta de avances concretos nas negociacións coa Xunta e asegurou que o profesorado está “farto de fotos e propaganda”. Segundo indicou, as demandas céntranse na recuperación de dereitos perdidos e na concreción documental de medidas laborais, fronte ao que considera unha sucesión de anuncios sen aplicación práctica.
Na mesma liña, desde STEG, Comba Campoi sostivo que o profesorado galego amosa unha crecente mobilización ante o deterioro continuado das condicións de traballo en todas as etapas educativas. Pola súa parte, representantes das Asembleas Abertas do Ensino Público destacaron a convocatoria como unha mostra de unidade do profesorado organizado desde os propios centros.
Xa diante da sede autonómica, docentes de diferentes etapas —desde Infantil ata Formación Profesional, ensinos artísticos e persoal substituto— participaron na lectura dun manifesto conxunto para visibilizar as problemáticas compartidas polo sector.
Entre as principais reivindicacións da xornada figuraron a recuperación do horario lectivo previo a 2010 —21 horas en Primaria e 18 en Secundaria—, a redución de ratios en todas as etapas, máis recursos humanos para atender á diversidade, menos burocracia, melloras salariais, a recuperación do pago do verán para o profesorado substituto con cinco meses e medio traballados, redución horaria a partir dos 55 anos e a restitución das licenzas retribuídas por formación.
A Xunta situou o seguimento da folga nun 8,61%, unha cifra inferior ás rexistradas nas cinco convocatorias anteriores deste curso, que oscilaron entre o 10% e o 14,5%. Porén, desde CIG cuestionaron estes datos e aseguraron que a participación foi semellante á doutras mobilizacións, criticando ademais problemas técnicos na ferramenta oficial de recollida de información.
Desde Vigo, o conselleiro de Educación, Román Rodríguez, cualificou a folga de “fóra de lugar” e vinculouna a unha estratexia política impulsada por organizacións nacionalistas e sindicais. O titular de Educación defendeu a vía de diálogo seguida, segundo afirmou, pola maioría das organizacións sindicais e contrapúxoa á postura da CIG, á que acusou de manter unha posición de bloqueo permanente.
Estas declaracións atoparon resposta inmediata por parte da central nacionalista, que denunciou non ter sido convocada a procesos reais de negociación durante o curso. Ademais, criticou o acordo acadado recentemente pola Xunta con CC.OO, UXT, ANPE e CSIF sobre redución horaria en Secundaria e outras medidas, reclamando acceso ao contido detallado desas propostas para avaliar o seu impacto real sobre o profesorado e o ensino público galego.
