A cidade de Santiago de Compostela volverá encher as rúas este martes 25 novembro, coincidindo co Día Internacional pola Erradicación da Violencia contra as Mulleres. A convocatoria principal na capital partirá ás 20:00 da Praza 8 de Marzo, impulsada pola Coordinadora Galega da Marcha Mundial das Mulleres (MMM), que este ano reivindica a necesidade de “combater a violencia institucional para acabar coa violencia machista”.
A organización puxo o foco na capital galega ao advertir xa nun comunicado previo que, malia coincidir hora e lugar con outras concentracións, se trata de actos independentes e non unitarios. A división do feminismo compostelán non é nova: desde 2023, tanto o 25N como o 8M celebran mobilizacións por separado tras as acusacións de “condutas transfóbicas” rexistradas hai dous anos.
A MMM reivindica que a violencia institucional “permea todos os ámbitos da vida” e impide avanzar nos dereitos das mulleres. A plataforma reclama xulgados específicos en violencia machista nas principais cidades galegas e o fin da custodia compartida imposta con maltratadores. Ademais, denuncia tamén a chamada violencia obstétrica, reclamando que se respecte o acompañamento en probas e partos, o consentimento informado e o cesamento de prácticas desaconselladas pola OMS, como a manobra Kristeller ou as episiotomías rutineiras.
As reivindicacións completan unha lista máis ampla de demandas que inclúen que as políticas de igualdade sexan centrais na acción de goberno, o cumprimento da lei integral contra a violencia machista e a presenza transversal das políticas feministas en todos os niveis institucionais.
En paralelo, as mobilizacións do 25N desenvolveranse nas principais cidades galegas ás 20:00: na Coruña, desde o Obelisco; en Ourense, desde Castañeira (San Lázaro); en Pontevedra, da Praza da Peregrina; e en Vigo, tamén con convocatoria propia de MMM desde Vía Norte. A cidade olívica acollerá, ademais, outra marcha ás 19:00, organizada pola asociación Resposta Feminista baixo o lema ‘Que a vergoña mude de bando. Feminismo sen tregua’.
En Lugo, a manifestación partirá ás 20:00 desde o Edificio da Xunta convocada pola Plataforma Feminista de Lugo, que marchará baixo o lema ‘Nin fronteiras nin portas pechadas, vivas libres e organizadas’.
En Compostela, as expectativas de participación sitúanse nun novo 25N multitudinario nun contexto de división interna, pero cunha mensaxe común: denunciar todas as violencias que afrontan as mulleres e reclamar políticas efectivas para a súa eliminación.
