O xerente do Servizo Galego de Saúde (Sergas), José Ramón Parada, negou “colapsos” en Urxencias do complexo hospitalario universitario de Santiago de Compostela (USC), na Comisión de Sanidade do Parlamento galego. Foi en resposta a unha pregunta do PSOE, que demandou medidas urxentes para que non se repitan situacións como a deste verán.
“Non é estrutural, son picos que non se poden prever”, sentenciou o xerente do Sergas, que rexeitou o “escenario apocalíptico” que, ao seu xuízo, manteñen os socialistas na súa denuncia sobre “presión asistencial”.
O xerente do Sergas manifestou entender a preocupación de pacientes e familiares pero situou o ocorrido nunha “elevada demanda asistencial” por, entre outras cuestións, “fluxos epidemiolóxicos non habituais no verán”, con alusión a unha maior afectación por procesos respiratorios.
“Pero iso non significa que o sistema estea colapsado, sempre se garante a atención máis inmediata para casos máis severos, detrás de cada incidente hai equipos que actúan con responsabilidade e con protocolos definidos”, aseverou para non descartar, no entanto, melloras.
Así o expuxo na Comisión 5ª, Sanidade, Política Social e Emprego, tras unha pregunta dos socialistas sobre os problemas provocados por “a presión asistencial” na unidade de Urxencias do Complexo Hospitalario Universitario de Santiago de Compostela este verán e as previsións da Xunta co fin de evitar estas situacións.
“A Xunta nada fixo”, afirmou o deputado socialista Aitor Bouza, que solicitou información sobre medidas “concretas” para evitar o “colapso” e a presenza, engadiu, de persoas nos corredores. “A realidade demostra que é algo estrutural e permanente no tempo”, indicou ao rexeitar que sexa algo “puntual”.
“Os datos están ben pero que vai facer a Xunta para que non volva ocorrer”, reiterou o parlamentario do PSdeG, quen incidiu en que o problema se remonta a antes deste ano. Así, remitiuse a informacións relativas a esta cuestión xa en 2019 e logo en anos posteriores.
