Persoal do Servizo de Prevención e Defensa contra Incendios Forestais (SPIF) percorreron este xoves as rúas de Santiago de Compostela para esixir á Consellería do Medio Rural un servizo “público, digno e con garantías laborais”. A marcha, encabezada cunha pancarta baixo o lema ‘Pola estabilidade do emprego e unhas condicións de traballo dignas’, comezou minutos despois das 11.00 horas desta xornada diante da Consellería do Medio Rural e finalizou ante o edificio da Xunta, en San Caetano.
No percorrido, os manifestantes entoaron cánticos como ‘Rueda, escoita, bombeiros en loita’ ou ‘bombeiros forestais, todos iguais’ e portaron carteis nos que se puido ler: ‘traballo digno todo o ano’ e ‘os nosos soldos non son un xogo’. Os bombeiros denunciaron que “non pode volver pasar” o deste verán cando “persoal sen experiencia, nin información adecuada estaba a dirixir o lume ou traballando nas brigadas de extinción”.
“Pasaron 15 días da finalización da campaña e non escoitamos ningún tipo de rectificación, autocrítica e nin sequera houbo dimisións despois da gravísima onda de incendios que sufrimos este verán”, sinalou en declaracións aos medios a secretaria nacional da CIG-Autonómica, Celtia Burgos, acompañada do bombeiro forestal, Xulio Saiáns. A continuación, criticou que “non se pode soportar” que haxa un servizo público “atomizado” con contratos que “se realizan no medio da onda de incendios” e que “non é 100 % profesional”.
Tras a onda de incendios deste verán que calcinou máis de 100.000 hectáreas –177.000 hectáreas segundo Copernicus– os bombeiros remarcaron a importancia dos traballos de restauración forestal. Por iso, reclamaron manter os mesmos postos de traballo durante todo o ano, xa que, segundo explicaron, a partir do 15 de novembro “das 2.400 persoas que integran o servizo, 983 deixarán de traballar”.
Así mesmo, afirmou que “é inadmisible” que en plena onda de incendios a Xunta “contratase a 200 persoas dunhas vacantes que estaban sen cubrir”. Os manifestantes tamén reclamaron unha “xestión preventiva” do territorio para poder actuar. “Non podemos actuar sobre o cambio climático, podemos actuar sobre como é o dispositivo e sobre como temos o territorio”, resolveu Celtia Burgos.
SITUACIÓN DE ABANDONO E DESIGUALDADE
Á súa chegada a San Caetano, os manifestantes leron un manifesto no que denunciaron a situación de “abandono, desigualdade e mala xestión” que “padece” o persoal do SPIF. Por iso, reclamaron un servizo “100 % público e único” no que todo o persoal teña “as mesmas condicións laborais”, garántaselle ” a súa seguridade” e teña “dignidade laboral e salarial”.
