Centos de taxistas chegados de toda Galicia rodearon a Xunta, na compostelá sede de San Caetano, na mañá deste mércores para esixir ao Goberno galego “cortar de raíz” as licenzas dos vehículos de turismo con condutor (VTC).
En declaracións a Europa Press, Miguel Ángel Mera, taxista en Santiago, explica que esta protesta a impulsan taxistas de Vigo polo “aumento incontrolable” de licenzas, pero se uniron a ela compañeiros de Santiago, A Coruña, Lugo ou Mos, entre outros lugares. Denuncia que é a Xunta a que outorga estas licenzas, polo que debería “pechar a billa”. Expón que aínda que, “en teoría”, os VTC só poden realizar servizos interurbanos con vehículo eléctrico –entre diferentes municipios–, na práctica están a traballar nas cidades a nivel urbano, tal e como se pode ver “cada día”.
A isto únese que aos concellos “pillounos un pouco a contrapé”, de modo que as empresas de VTC aprovéitanse de “un pequeno buraco legal” para facer servizos “ilegais” nas cidades. “As administracións están a deixarnos de lado á hora de pór sancións e controis aos VTC”, relata. “Se a Xunta di que son os concellos os que deberían de sancionar, pois deberían sancionar”, indica. “Que se tramiten as sancións, pero esas sancións non acaban de chegar, quedan un caixón”, lamenta.
Os convocantes calculan que participaron entre 400 e 500 taxis, que rodearon a Xunta e bloqueado a rúa Otero Pedrayo. Os taxistas concentráronse no polígono do Tambre pola mañá antes de circular por rúas como a avenida de Lugo, Hórreo e San Roque até chegar ao complexo de San Caetano. Prevén que as mobilizacións sigan no futuro ata que haxa solucións.
