Centos de docentes concentráronse este martes en Santiago de Compostela para reclamar “un xiro” nas políticas educativas da Xunta. A manifestación, convocada pola CIG-Ensino e o STEG, rodeou o edificio administrativo de San Caetano entre ruído de cacerolas, chifres e pandeiretas, e coincidindo co inicio dunha folga de 48 horas en todo o ensino público galego.
Os manifestantes portaban cabazas, coas que simbolizaron o “suspenso” do Goberno autonómico en materia educativa, e pancartas nas que se podían ler mensaxes como ‘Conselleiro dimisión’, ‘A mestra loitando tamén está ensinando’ ou ‘Non á masificación’.
A secretaria nacional da CIG-Ensino, Laura Arroxo, afirmou que “xa non é unha cuestión de dereitos, senón de dignidade” e instou á Consellería de Educación a “deixar de investir en empresas privadas e apostar polo ensino público”. Pola súa banda, a secretaria de Acción Sindical do STEG, Comba Campoy, advertiu de que “o profesorado está farto e non queda outro camiño que saír ás rúas ata que o señor Román Rodríguez se digne a atendelos”.
Durante o percorrido, que comezou arredor das 12:00, escoitáronse cánticos como ‘Ou ensino non véndese, deféndese’ e ‘Román escoita, o ensino está en loita’. Dúas persoas marcharon coas cabezas cubertas por cabazas nas que se podía ler ‘Roda’ e ‘Román’, en alusión ao conselleiro.
En vésperas do Samaín, Arroxo sinalou que esta data representa “a unión entre o mundo dos mortos e dos vivos” e acusou o Partido Popular de querer “un ensino público no mundo dos mortos”. “O ensino público está máis vivo que nunca, e imos seguir loitando para que siga así”, engadiu.
A protesta finalizou co encontro entre o profesorado e unha manifestación do Sindicato de Estudantes, que denunciaba o acoso escolar, e que se uniu á marcha ao berro de ‘Ensino público e de calidade’.
A folga, que abrangue educación infantil, primaria, secundaria, bacharelato, FP e ensinos de réxime especial, afecta segundo a CIG a máis de 30.000 docentes e preto de 400.000 estudantes en toda Galicia.
Entre as principais reivindicacións figuran a redución de ratios a partir do curso 2026/27, a recuperación do horario lectivo recortado en 2011 e 2012, a fin das desigualdades horarias nos centros de formación profesional e artísticos, un plan real contra a burocracia e melloras salariais e laborais, incluíndo a redución da xornada a partir dos 55 anos e a recuperación das licenzas por formación retribuídas.
As organizacións sindicais teñen previsto continuar as mobilizacións este mércores con novas manifestacións ante as delegacións provinciais da Consellería de Educación.
