O Consello do Estudantado da Universidade de Santiago de Compostela (USC) lamentou a “morte das matemáticas en Galicia” tras a desaparición do máster no devandito centro universitario.
Nun comunicado, os estudantes mostraron o seu “loito” despois de que ao abrirse o prazo de solicitude de prazas para máster da USC non estea nas listas o máster en Matemáticas. “A decisión da Xunta de impedir a oferta de novo ingreso neste máster, non recoñecendo tampouco a súa singularidade, consolídase a día de hoxe coa morte das matemáticas en Galicia”, apuntaron, lembrando a “mobilización” da comunidade universitaria en defensa do mesmo con case 5.000 firmas.
A pesar de ser preguntado o conselleiro de Educación, Ciencia, Universidades e Formación Profesional, Román Rodríguez, a súa resposta foi “censurable”, xa que “acusou os defensores do máster de estar sobreactuando” e defendeu que existe un “compromiso” por parte do Goberno galego para restaurar o título a partir dunha proposta de reforma do plan de estudos.
“Estas palabras son baleiras e repetidas, xa que non é a primeira vez que se comprometen a unha revisión do título e termina sen resultados. Mentres tanto, Galicia segue perdendo talento investigador e académico nas áreas fundamentais da matemática pura e aplicada”, engadiu o Consello do Estudantado. Neste contexto, a Plataforma en Defensa do Mestrado en Matemáticas, con apoio dos estudantes, reclamou a dimisión do secretario xeral de Universidades, José Alberto Díez de Castro, pola súa “responsabilidade directa” neste proceso.
