A Casa Xohana Torres de Santiago de Compostela estreou unha nova etapa co obxectivo de consolidarse como un espazo de referencia na igualdade, a diversidade e os dereitos LGTBI. A iniciativa foi presentada pola alcaldesa Goretti Sanmartín, acompañada pola coordinadora do servizo, Eva Garabal, e parte do equipo do centro. Segundo destacou a rexedora, trátase dunha aposta por fortalecer este equipamento municipal como un lugar para o impulso da transformación social e para o encontro co tecido feminista e asociativo da cidade.
O relanzamento da Casa trae consigo unha axenda mensual de actividades abertas ao conxunto da cidadanía, pero con especial atención aos colectivos feministas e LGTBIQ+. Están previstos obradoiros, charlas e accións formativas sobre temas como violencia machista, diversidade corporal, coidados ou saúde sexual, que buscan crear espazos de reflexión e apoio.
A primeira actividade da nova programación será o vindeiro luns 26 de maio ás 19.00 horas, coa presenza da activista paraguaia Magda Piñeiro, fundadora do colectivo Stop Gordofobia e experta en estudos de xénero. A súa intervención, titulada ‘Violencia estética e diversidade corporal, unha cuestión de xénero’, abrirá a nova etapa do centro cunha reflexión sobre as discriminacións ligadas á aparencia física e o control dos corpos.
Un dos principais cambios anunciados é a posta en marcha dun servizo específico de asesoramento LGTBIQ+, que atenderá tanto presencial como telefonicamente, ademais de contar cun correo electrónico de contacto (casaxt@santiagodecompostela.gal). A atención telefónica estará dispoñible de luns a venres de 09.00 a 19.00 horas, mentres que a presencial será os luns, mércores e venres pola mañá (09.45 a 13.00) e os martes pola tarde (16.00 a 19.30).
Este novo servizo responde a unha demanda dos colectivos locais e estará centrado na atención psicolóxica e xurídica das persoas LGTBIQ+ e o seu entorno. Así, ofrecerase apoio psicosocial e orientación legal tanto a título individual como para asociacións ou entidades interesadas en promover dereitos e combater as discriminacións por orientación sexual ou identidade de xénero.
Segundo explicou Eva Garabal, o centro pretende establecer un modelo de funcionamento participativo e híbrido, no que convivirán as tarefas desenvolvidas por persoal municipal co traballo colaborativo co movemento feminista da cidade. Neste sentido, promoveranse espazos de encontro e investigación, desde os que xurdirán novas liñas de actuación, campañas informativas e materiais divulgativos.
A coordinadora salientou que o obxectivo último é ‘tecer redes e estender os feminismos’, apostando por unha estrutura viva, en constante diálogo cos axentes sociais implicados e aberta á participación da veciñanza compostelá. A Casa Xohana Torres, creada como centro municipal de recursos pola igualdade, reafirma así o seu compromiso cunha cidade máis xusta, diversa e libre.
