Un grupo de afectados por roubos en contas bancarias concentrouse este sábado ante unha oficina de Abanca en Santiago de Compostela para denunciar a falta de actuación da entidade ante os casos de estafa que, segundo sosteñen, se producen por fallos no sistema de seguridade da propia banca.
O portavoz da Plataforma de Afectados polas Estafas Bancarias, Eduardo Sebio, asegurou que nos últimos meses recibiron numerosas queixas de clientes que sufriron subtraccións de cartos das súas contas, algunhas delas por importes que alcanzan os 20.000 euros. Segundo o colectivo, a entidade nega sistematicamente todas as reclamacións e responsabiliza os propios usuarios do sucedido.
Os manifestantes sosteñen que a entidade financeira non dispón das medidas de seguridade necesarias para evitar que os estafadores suplanten a súa identidade e accedan aos datos bancarios dos clientes. Segundo explican, as fraudes prodúcense a través de chamadas ou mensaxes falsas que aparentan ser enviadas polo banco, enganando os usuarios para que faciliten información clave.
“Hai unha neglixencia grave por parte do banco, xa que non protexe os datos dos seus clientes nin ten unha seguridade adecuada”, afirmou Sebio. O portavoz engadiu que Abanca “aforrou cartos na banca presencial” ao pechar oficinas e reducir persoal, pero non investiu o suficiente en seguridade dixital.
RECLAMAN SOLUCIÓNS E ACCIÓNS LEGAIS
Os afectados esixen que Abanca asuma a responsabilidade polos casos de fraude e restitúa os cartos roubados. Tamén demandan que as administracións públicas tomen medidas para obrigar ás entidades financeiras a garantir a seguridade dos seus clientes.
“A banca dixital non pode supor unha desprotección para os usuarios. Non chega con mandar mensaxes dicindo que se desconfíe, teñen que garantir que exista seguridade real”, advertiu Sebio.
Ante a falta de resposta da entidade, os afectados anunciaron novas mobilizacións e avanzaron que seguirán presentando denuncias nos xulgados ata obter unha solución.
