Un grupo de persoas concentrouse este sábado na Praza Roxa de Santiago de Compostela para reclamar o alto ao lume definitivo en Palestina e esixir unha solución baseada na paz e na xustiza. A protesta foi organizada pola iniciativa parlarguerra.es e forma parte dunha serie de mobilizacións que se están a desenvolver en 60 localidades de todo o Estado.
Os manifestantes portaron unha pancarta coa mensaxe “Por unha Paz Xusta (Palestina Libre). Cesamento do fogo Definitivo. Nin Terrorismo, Nin Xenocidio”, incidindo na necesidade de deter a violencia e garantir o cumprimento das resolucións da ONU e da Unión Europea sobre o conflito.
A PRESIÓN INTERNACIONAL COMO CLAVE PARA O CESAMENTO DA VIOLENCIA
Os asistentes á concentración destacaron que o actual alto ao lume “é o resultado das presións e da mobilización internacional”, polo que insistiron en que “non se deben deter as protestas ata que se cumpra a legalidade internacional”.
“Non imos parar ata que as bombas paren”, afirmaron os convocantes, que insisten na importancia de manter a presión cidadá para lograr un cambio na situación no territorio palestino.
Esta mobilización súmase ás múltiples convocatorias que, nos últimos meses, tiveron lugar en distintas cidades galegas e españolas en apoio á poboación palestina.
