A portavoz nacional do BNG, Ana Pontón, fixo este sábado un chamamento á cidadanía para que participe na manifestación convocada pola Plataforma Queremos Galego en Santiago de Compostela. A mobilización, que terá lugar este domingo, busca denunciar as políticas que, segundo a formación nacionalista, supoñen un “acoso e derriba” contra a lingua galega por parte do PPdeG.
Durante un acto celebrado en Vilar de Santos, Pontón expresou a súa preocupación polo estado da lingua galega e asegurou que nos últimos 15 anos o goberno do PP na Xunta aplicou políticas que a levaron a unha situación “crítica”.
“Fágovos ese chamamento a unha gran mobilización, que deixe claro que en Galicia sentimos orgullo do noso idioma e que queremos deixar atrás esas políticas de acoso e derriba contra o galego”, declarou a portavoz nacionalista.
Segundo Pontón, o obxectivo do PPdeG sería “converter o galego nunha lingua residual”, unha situación que, ao seu xuízo, debe ser freada con “mobilización e compromiso”.
DEFENSA DO GALEGO COMO LINGUA DE FUTURO
A líder do BNG defendeu que o galego forma parte do patrimonio cultural de Galicia e debe ser transmitido ás futuras xeracións. “Sabemos que o galego é unha lingua que herdamos dos nosos avós, dos nosos pais, e que queremos que herden os nosos fillos e netos”, manifestou.
Neste sentido, insistiu en que a manifestación convocada en Santiago é unha oportunidade para “dicir desde o amor e a confianza no país que queremos vivir en galego“.
A mobilización, organizada pola Plataforma Queremos Galego, ten como obxectivo reivindicar medidas de protección e promoción do idioma, así como frear as políticas que, segundo denuncian, están a prexudicar a súa presenza en diferentes ámbitos sociais.
BESTEIRO ANIMA A PARTICIPAR
O secretario xeral do PSdeG, José Ramón Gómez Besteiro, fixo este sábado un chamamento á cidadanía para participar na manifestación convocada pola plataforma Queremos Galego en Santiago de Compostela en defensa da lingua galega.
Desde a Feira do Butelo da Fonsagrada (Lugo), onde asistiu ao acto de inauguración, Besteiro asegurou que a marcha “non vai contra ninguén”, senón que busca reivindicar o galego como “o aceno de identidade máis próximo e íntimo de todos os galegos”. O líder socialista confirmou a súa asistencia e subliñou que é necesario “protexer, preservar e difundir” o idioma para que “máis galegos e galegas, e tamén aqueles que chegan a Galicia, o fagan seu”.
“Animamos a todo o mundo a achegarse”, engadiu, insistindo en que a protesta ten un carácter positivo e busca a “exaltación do que somos como pobo”.
Ademais do chamamento á mobilización, Besteiro aproveitou a súa presenza na Fonsagrada para anunciar unha iniciativa parlamentaria que o PSdeG defenderá nos próximos días. O obxectivo da proposta é que a Xunta impulse o uso de produtos de proximidade e de quilómetro cero nos comedores das residencias e centros educativos dependentes da Administración autonómica.
Segundo explicou, a intención é potenciar os alimentos locais e apoiar o sector primario galego, garantindo que os produtos servidos nos comedores públicos favorezan a economía do rural.
Besteiro tamén destacou a importancia da Feira do Butelo da Fonsagrada, un evento con case tres décadas de historia no que este produto se consolida como “o rei da montaña” e protagonista da gastronomía e da economía da zona”.
