O Concello de Santiago destinará 400.000 euros en axudas a organizacións non gobernamentais de desenvolvemento para realizar proxectos de cooperación en países empobrecidos. O programa municipal de apoios ás ONGD foi presentado este venres en rolda de prensa pola concelleira de Dereitos e Servizos Sociais, María Rozas.
O concello compostelán incrementa un 138 % a partida dedicada a este programa creado en 2017 que alcanza nesta edición o seu orzamento máis alto, segundo trasladou o consistorio nun comunicado. “Estas bases son o reflexo do compromiso do goberno coa cooperación ao desenvolvemento e con ter un concello verdadeiramente solidario”, incidiu a concelleira.
Os proxectos poderán recibir ata un máximo de 40.000 euros, 15.000 máis que na anterior edición, ata sufragar o 95 % do orzamento total da iniciativa. O pago da subveción realizarase de forma anticipada ata o 100 % da súa contía, que será recoñecido de forma implícita no momento da concesión da axuda a diferenza das anteriores edicións, cando tiñan que solicitalo.
