O prazo para solicitar as bolsas de comedor escolar, material e actividades extraescolares do Concello de Santiago estará aberto desde este mércores, 1 de xullo, ata o 14 de xullo, unha vez publicada a convocatoria no Boletín Oficial da Provincia. O Concello de Santiago destina a estas axudas 1.150.000 euros, 50.000 euros máis que no curso pasado. “O obxectivo é seguir reforzando unhas bolsas que son unha das principais ferramentas das que dispoñemos para facilitar a igualdade de oportunidades e a conciliación das familias de Santiago”, explica a concelleira de Dereitos e Servizos Sociais, María Rozas.
A convocatoria inclúe tres modalidades de axuda: as bolsas por escaseza de recursos, que poden ser de comedor ou para a realización de actividades extraescolares e ás que poden acceder os nenos e nenas de familias que non superen a renda per cápita do 100% do IPREM anual; as bolsas para a adquisición de material escolar; e as bolsas de comedor por razóns de conciliación.
As bolsas de comedor escolar por escaseza de recursos terán unha contía de 100 euros mensuais, salvo no caso do alumnado dos centros de educación especial, que poderán recibir ata 180 euros mensuais. Para a realización de actividades escolares abonaranse axudas de 35 euros mensuais por menor e, ao contrario do que ocorría en anteriores convocatorias, esa contía será con independencia do número de actividades realizadas e as horas de asistencia ás mesmas.
En canto ás bolsas para a adquisición de material escolar serán de ata un máximo de 100 euros mensuais; e as bolsas de comedor por razóns de conciliación quedan fixadas en 45 euros mensuais. Nestes dous casos, elevouse o limiar de renda con respecto a anteriores convocatorias, e poderán acceder ás axudas os nenos e nenas de familias que non superen a renda máxima familiar anual de 5,5 veces o IPREM.
