O concelleiro de Mobilidade de Santiago, Xan Duro, avanzou que o luns o Concello recibirá o informe económico-financeiro para a municipalización dos aparcadoiros de Praza de Galicia e Praza de Vigo por parte da empresa á que se lle encargou. Ademais, durante a próxima semana, o Goberno local porá data á próxima reunión da comisión de estudo “co tempo suficiente para que o resto de membros da corporación municipal poidan estudar con calma o informe”.
Trasladouno no marco dunha proposición presentada polo grupo municipal do PSOE para avanzar no novo modelo de xestión de ambos os aparcadoiros. A través dela, o concelleiro Sindo Guinarte instou ao Goberno local a convocar unha nova reunión desta comisión —que só se reuniu para constituírse— e a dar a coñecer os resultados do estudo. Na súa resposta, Duro admitiu, en parte, as críticas polo tempo transcorrido: “Teño que recoñecer e asumir que non fomos todo o áxiles por diferentes circunstancias, debates xurídicos e a carga de traballo do departamento de Tráfico e Mobilidade”.
Unha vez feito o anuncio, Guinarte pediu “diálogo” a partir da semana que vén. Pola súa banda, Gonzalo Muíños tachou isto como un “exemplo máis dunha falta de planificación” e augurou problemas polos “diferentes intereses partidistas”. Tamén solicitou que se valore a inclusión das concelleiras non adscritas na comisión. Adrián Vila (PP) afeou que nun ano non se convocase a comisión, lembrando que o seu partido xa pedira estes estudos en 2020.
INGRESADOS OS 5,1 MILLÓNS POLA VENDA DE PARCELAS
Por outra banda, o Concello de Santiago xa ingresou o total de 5,1 millóns de euros contemplados pola venda de parcelas municipais. O concelleiro de Urbanismo, Iago Lestegás, manifestou que o Goberno local mantén a intención de destinalos aos propósitos negociados co PSOE no acordo orzamentario de 2025. Por iso, o bipartito (BNG e Compostela Aberta) votou en contra dunha proposición socialista que pedía abrir unha nova negociación sobre o seu destino.
O último destes ingresos, de 2,9 millóns, foi recibido precisamente esta mañá. Lestegás subliñou que estes solares deben destinarse a vivenda protexida e que o Concello utilizará a maior parte dos fondos para ampliar o parque de vivenda municipal a través da rehabilitación. A concelleira non adscrita Mercedes Rosón reprochou ao Grupo Socialista unha “intencionalidade clara de borrado” cara a ela e as súas compañeiras, sentenciando que “non cabe negociar o xa negociado”.
Pola contra, Rosario Ferreiro (PP) acusou ao Goberno local de “mercantilizar” co chan público e instouno a ceder terreos á Xunta para construír vivenda 100% pública. Lestegás replicou que o Goberno galego non busca facer vivenda pública nestas parcelas, senón “promocionar vivendas para despois vendelas”.
