A corporación municipal de Santiago deu luz verde este xoves, durante a sesión plenaria, ao expediente que permitirá avanzar no cobro das nóminas pendentes das traballadoras dos centros socioculturais municipais afectadas polos impagos da antiga concesionaria, Serviplus. O acordo supón a aprobación dunha indemnización sustitutiva correspondente ás facturas de novembro e decembro de 2025, servizos xa prestados pola empresa e cuxo pagamento fora retido polo Concello ante a situación laboral xerada.
Esta decisión administrativa constitúe un paso necesario para poder facer efectiva a cesión do dereito de cobro e, dese xeito, canalizar directamente eses fondos cara ao persoal afectado, ao que a empresa adebeda tamén os salarios de xaneiro e febreiro de 2026. Segundo explicou o concelleiro de Centros Socioculturais, Xan Duro, o procedemento impulsado pola Administración local busca utilizar as cantidades bloqueadas á concesionaria para cubrir a débeda coas empregadas, aínda que incidiu en que o aprobado non supón aínda o aboamento directo das cantidades, senón a validación burocrática previa imprescindible para completar o proceso.
Duro sinalou que o mecanismo empregado é novo para o Concello e de especial complexidade técnica, ao requirir a aceptación por parte da empresa da cesión de dereitos para que a administración poida transferir os fondos ás traballadoras. O edil asegurou que os distintos departamentos municipais continúan traballando para pechar canto antes o procedemento e agradeceu ao persoal a súa “paciente infinita” durante meses marcados pola incerteza.
O expediente saíu adiante cos votos favorables do goberno local, formado por BNG e Compostela Aberta, así como do PSOE e das concelleiras non adscritas, mentres o Partido Popular optou pola abstención.
Durante o debate plenario, a oposición puxo o foco non tanto na aprobación formal do trámite como nos tempos reais para que o persoal reciba finalmente os cartos. O concelleiro popular José Ramón de la Fuente cargou contra a actuación do executivo local, ao que responsabilizou da xestión realizada nos últimos dous anos e medio e cuestionou a demora na procura dunha solución efectiva para as empregadas afectadas.
Na mesma liña, o concelleiro non adscrito Gonzalo Muíños reclamou acelerar ao máximo os pasos administrativos pendentes, mentres a socialista Marta Abal advertiu da falta de concreción sobre cando se materializará o ingreso efectivo das cantidades adebedadas.
