O Consello da Xunta aprobou inicialmente o proxecto de interese autonómico (PIA) para desenvolver chan no ámbito SUD1 ‘Mallou‘, en Santiago de Compostela, onde se prevén 3.609 vivendas, maioritariamente protexidas. Este é o sétimo PIA que tramita a Administración autonómica que alcanza a aprobación inicial, no marco da Estratexia galega de chan industrial.
O ámbito do PIA acolle 519.935 metros cadrados e está situado no lugar de Mallou, na zona norte de Santiago. Os terreos do sector comprenden a conca alta do río Sar e sitúanse a unha altitude media de 300 metros. O ámbito ordenado estrutúrase en cinco grandes cuarteróns separados por unha rede viaria estruturante. Así, dentro de cada un deles organízase en cuarteróns menores onde se localizan as zonas para vivendas, equipamentos públicos, zonas verdes e unha rede viaria de servizo ou acceso.
A proposta de ordenación prevé un número aproximado de 3.609 vivendas, das cales o 80% serán protexidas, integradas en bloques de tipoloxía residencial de vivenda colectiva, con alturas que varían entre B+1 e B+9+BC. O número de prazas de aparcadoiro prevista é de 3.558.
