O Pleno municipal de Santiago rexeitou o expediente de recoñecemento extraxudicial de crédito que permitiría o pago de 119 facturas pendentes, 26 delas correspondentes a unha débeda do contrato do lixo con Viaqua. A proposta contou cos votos a favor do BNG, Compostela Aberta e PSOE, o voto en contra do Grupo Municipal Popular e a abstención das concelleiras non adscritas.
O concelleiro de Facenda, Manuel César Vila, explicou que o expediente sumaba 1.358.975,85 euros de débeda a 65 provedores. Destacou as 26 facturas de Viaqua, por valor de 992.395,30 euros, correspondentes ao cobro da taxa do lixo, un contrato finalizado en 2019 e cuxas facturas deixaron de pagarse en xullo de 2021.
A edil socialista Marta Abal felicitou ao goberno por “desbloquear” o pago das facturas de Viaqua, pero reiterou a necesidade de “cambiar o sistema de recadación”. O portavoz das non adscritas, Gonzalo Muíños, criticou que, a finais de 2025, se sigan abonando facturas de anos anteriores, o que mostra un mal “modelo de contabilidade” e un “abuso do contrato menor”.
Pola súa banda, a concelleira popular Rosario Ferreiro mostrou a súa sorpresa por ver facturas de 2023 e 2024, e puxo en dúbida a legalidade das facturas de Viaqua. A alcaldesa pediu finalmente aos grupos que fosen “responsables” coas empresas e os veciños que están á espera de cobrar, lamentando que a oposición se opuxese ao pago cun expediente con todos os informes pertinentes.
