A portavoz do Goberno local de Santiago, Míriam Louzao, anunciou a aprobación do expediente para contratar a redacción do proxecto de execución das novas instalacións do Parque de Bombeiros da Pulleira. O orzamento base para a redacción do proxecto é de 202.585,97 euros, cun prazo de presentación de tres meses.
Louzao explicou que o parque terá unha superficie útil de máis de 3.000 metros cadrados nunha parcela de 20.000 metros cadrados, estimándose o orzamento de execución nuns 3,5 millóns de euros.
O novo parque está concibido para albergar o servizo comarcal de bombeiros, para o cal se están negociando os acordos coa Dirección Xeral de Emerxencias e o Consorcio Provincial Contraincendios e Salvamento da Coruña. A portavoz engadiu que o Consorcio xa enviou a semana pasada o resultado da súa revisión do texto do convenio.
O proxecto contemplará zonas de administración, aloxamento e aparcadoiro de vehículos de emerxencia, ademais da urbanización mínima da parcela e a conexión a servizos desde a rúa Cruceiro da Coruña.
REDE DE SANEAMENTO
Entre outros asuntos, Míriam Louzao tamén comunicou a aprobación da licitación das obras de ampliación da rede de saneamento no sector leste do lugar de Formarís (A Enfesta). O presuposto base para esta actuación, incluída no Plan Provincial de Cooperación, é de 263.039,50 euros.
Esta obra permitirá dar servizo ás vivendas da Sionlla de Abaixo e Formarís, conectándoas á rede existente na Sionlla de Arriba. O proxecto implica a implantación de 840 metros de tubaxes e a construción dunha estación de bombeo para o ámbito norte, na Sionlla de Abaixo.
