O Concello de Santiago impuxo cinco sancións que suman 19.025,91 euros á empresa Urbaser, concesionaria do servizo de recollida de residuos, por distintos incumprimentos das condicións contractuais.
Segundo informou o Goberno local nun comunicado, a resolución declara a compañía “responsable das infraccións en materia de medios persoais, materiais, reposición e substitución de illas enterradas, cuarteis non operativos e limpeza e desinfección de colectores”, cometidas na execución do contrato municipal.
Raxoi rexeitou as alegacións presentadas pola empresa ao considerar que “non desacreditan os feitos probados”. Entre as sancións destaca unha infracción moi grave, valorada en 9.015,19 euros, pola falta de medios persoais comprometidos no contrato. A isto súmase unha falta grave de 3.005,6 euros pola demora na posta a disposición da infraestrutura informática e tecnolóxica prevista.
Tamén se impoñen dúas faltas leves, de 1.000 euros cada unha, pola demora na reposición de illas enterradas e pola inactividade dun dos cuarteis da brigada de limpeza, ademais dunha nova infracción grave, con sanción de 6.005,12 euros, por deficiencias na limpeza e desinfección de colectores.
Ademais destas penalizacións, o Concello aplica descontos mensuais polos servizos non prestados, de acordo coas auditorías realizadas. Entre xaneiro e setembro de 2025, estes descontos sumaron 128.636,69 euros.
Dende Raxoi subliñaron que o Goberno local “mantén a vixilancia sobre o cumprimento escrupuloso do contrato para velar polo interese xeral”, incidindo en que se continuará avaliando de forma regular o funcionamento do servizo de recollida de lixo na cidade.
