A alcaldesa de Santiago de Compostela, Goretti Sanmartín, cualificou a obra de ampliación e modernización da depuradora da Silvouta como un “momento histórico” para a cidade e a súa contorna, ao tempo que advertiu da necesidade de manter “todos os controis” durante o proceso.
Sanmartín respondeu así ás preguntas dos medios sobre as demandas do Concello de Ames tras a vertedura producida no río Sar o pasado 12 de outubro. Indicou que o goberno compostelán está “en contacto permanente” coas entidades implicadas e que os traballos actuais “buscan poñer remedio a moitos anos de verteduras nos que a antiga depuradora non foi suficiente para tratar toda a auga”.
“A obra da Silvouta é un momento histórico, pero durante a súa execución debemos garantir todos os controis”, subliñou a rexedora, quen destacou que o Concello mantén un “diálogo continuo” cos responsables da xestión da planta, coas empresas adxudicatarias e con Augas de Galicia, entidade competente na supervisión do proxecto.
Pola súa banda, o alcalde de Ames, Blas García, reclamou “maior información e coordinación entre administracións” tras o episodio de contaminación e insistiu na necesidade de ampliar a depuradora de Sisalde, que dá servizo ao municipio. “O Sar leva anos sufrindo problemas e agora estanse facendo obras para poñerlles fin, pero isto non se arranxa só coa depuradora da Silvouta”, sinalou.
García lembrou que o deterioro do río é unha cuestión de longa data: “Os veciños contan que hai anos podían bañarse e coller troitas no Sar; hoxe é imposible”. O rexedor insistiu en que o novo sistema de saneamento debe contemplar unha mellora integral que inclúa tanto Compostela como Ames para garantir a recuperación ambiental do río Sar.
