A Federación Galega de Municipios e Provincias (Fegamp) e os concellos da Coruña, Santiago e Vigo manterán o vindeiro 4 de novembro, ás 13:00, unha reunión telemática centrada na situación dos vehículos de transporte con condutor (VTC) nestas cidades.
Segundo confirmaron fontes da Fegamp e do Concello de Santiago, o encontro é resultado dos contactos previos entre as concellarías de mobilidade das tres principais urbes galegas, tanto a nivel técnico como político. O obxectivo é avaliar a problemática derivada da presenza e regulación dos VTC, un asunto que nas últimas semanas xerou preocupación entre os profesionais do taxi e debate nas administracións locais.
A convocatoria chega en pleno contexto de mobilizacións do sector do taxi, que o pasado mércores reuniu arredor de un milleiro de traballadores de toda Galicia nunha marcha lenta pola capital compostelá. A protesta percorreu as rúas de Santiago en caravana e pasou diante do Parlamento galego e de varios edificios da Xunta, en demanda dunha maior implicación do Goberno autonómico no control e supervisión das licenzas de VTC.
O encontro do luns pretende coordinar posturas e estudar posibles medidas conxuntas fronte a unha situación que, segundo os representantes municipais, require dun marco común de actuación para garantir o equilibrio entre os diferentes modos de transporte urbano.
