O proxecto ‘Galicia Spa Pilgrimage’, impulsado pola Xunta de Galicia, será presentado o próximo mes de novembro en Nova York ante axencias e operadores turísticos, nun acto organizado por Turespaña. A iniciativa pretende posicionar o termalismo galego como produto internacional ligado ao Camiño de Santiago, combinando saúde, benestar e espiritualidade para atraer visitantes fóra das tempadas altas.
A proposta, integrada no Plan de Turismo Termal de Galicia, busca conectar os recursos termais coas rutas xacobeas mediante paquetes que inclúan etapas do Camiño, experiencias de relax e estancias en establecementos especializados. O obxectivo é consolidar a presenza deste tipo de oferta nos programas de viaxes do mercado norteamericano, aproveitando tamén a liña aérea directa entre Santiago e Nova York.
Este venres celebrouse no Hotel Louxo da Illa da Toxa unha reunión entre o director de Turismo de Galicia, Xosé Merelles, e representantes do sector termal galego, na que se avanzou na preparación do proxecto. Durante o encontro, Merelles subliñou que a combinación de termalismo e Camiño de Santiago “representa unha oportunidade estratéxica para diversificar o turismo, atraer novos perfís de visitantes e xerar actividade económica durante todo o ano”.
O responsable autonómico engadiu que este tipo de propostas “reforzan a imaxe de Galicia como destino sustentable, saudable e competitivo, apostando por un modelo que combina tradición, innovación e calidade”.
