A Cámara de Comercio de Santiago de Compostela reclamou esta semana en Bruxelas a creación dunha “nova macrorregión atlántica” dentro da Unión Europea e reiterou a súa demanda para que se suprima a peaxe da AP-9, considerada unha infraestrutura esencial para a conexión territorial e económica de Galicia co resto da fachada atlántica.
As peticións foron formuladas no marco do foro da alianza das Cámaras de Comercio do Arco Atlántico (Archam), un encontro que reúne a representantes empresariais de Portugal, España e Francia para debater estratexias de cooperación e cohesión entre os territorios que compoñen o espazo atlántico europeo.
A primeira xornada do foro tivo lugar este luns na delegación da Presidencia da Comisión do Arco Atlántico, onde se analizaron os proxectos en curso e se aprobaron as conclusións e acordos que orientarán o desenvolvemento da iniciativa. Entre eles, destaca a aposta pola creación dunha macrorregión que permita reforzar o peso político e económico da fachada atlántica fronte a outras áreas europeas.
Na segunda xornada, celebrada este martes na sede do Parlamento Europeo, as cámaras participantes puxeron en común unha visión integrada do desenvolvemento do Arco Atlántico, concibida como un paso decisivo cara á consolidación da macrorregión. A Cámara compostelá subliñou a importancia de mellorar as conexións viarias e portuarias, así como de eliminar barreiras como a peaxe da AP-9, para garantir un crecemento sostido e equilibrado da zona.
