A lavandaría industrial Ilunion, do grupo social ONCE, situada no compostelán Polígono do Tambre, celebrou este venres un acto de “reinauguración” ao ampliar o seu centro, que ten capacidade para xestionar uns 7,5 millóns de quilos de roupa ao ano (neste 2024 serán ao redor de 6,5 millóns de quilos) e conta con 198 traballadores, o 90 por cento deles con discapacidade. Todo iso cun investimento global de 12 millóns de euros desde a súa posta en marcha en 2009.
O presidente da Xunta, Alfonso Rueda, acudiu a este acto acompañado dos conselleiros de Política Social, Fabiola García, e de Emprego, José González, ademais do presidente do ONCE, Miguel Carballeda, e o conselleiro delegado de Ilunion, Alejandro Oñoro, entre outros. Este centro está dividido en dúas factorías, unha inaugurada en 2009 e outra de recente creación.
Entre outros, dedícase á limpeza de roupa e sabas de hospitais públicos, residencias de maiores e hoteis, así como de uniformes de diferentes profesionais, como os do 061. O director do centro de Ilunion en Santiago, Rafael Pichel, foi o encargado de realizar a visita polas instalacións, que abarcan máis de 5.000 metros cadrados e a súa ampliación supuxo a creación 30 postos de traballo para persoas con discapacidade.
UNIFORMES DE MÁIS DE 20.000 TRABALLADORES
En concreto, este centro limpa os uniformes de 21.000 traballadores e entréganse co nome asignado de cada persoa. Actualmente, encárgase duns 9.000 uniformes a diario, pero ten capacidade para uns 14.000. Ademais, lávanse unhas 11.000 pezas de hospital ao día. As máquinas das que se encargan os traballadores poden lavar, secar, pasar o ferro, dobrar e apilar unhas 1.500 sabas de hospital á hora.
HOTEL EN GALICIA
Pola súa banda, o conselleiro delegado de Ilunion, Alejandro Oñoro, remarcou que o “fin último é crear emprego” e queren “crecer” e “crear máis emprego aquí”. Por iso, asegura que lle “encantaría” abrir en próximos “anos ou meses” un hotel en Galicia, como os que ten a cadea noutras comunidades. Precisamente, o presidente da Xunta, Alfonso Rueda, recolleu a luva e dixo que o tema do hotel “hai que solucionalo canto antes”, polo que ofreceu a colaboración do Goberno galego, máis cando Galicia “bate marcas de turismo”.
Igualmente, Rueda puxo en valor esta ampliación de instalacións co que se consegue que haxa xente que teña “esperanzas grazas a iniciativas como esta”. “Quen non quere facer un mundo mellor?”, preguntouse para responder: “Todo o mundo”. Alfonso Rueda lembra que o traballo desta lavandaría foi “fundamental” durante a pandemia para a limpeza de roupa de residencias. “Se quere seguir apostando por Galicia, Galicia seguirá apostando por vós”, díxolle a Ilunion.
