A portavoz do goberno local de Santiago de Compostela, Míriam Louzao, confirmou este luns que o Concello presentou xa as súas alegacións ao recurso contencioso interposto pola Unión Hoteleira Compostela contra a chamada taxa turística. O executivo municipal asegura que “non concorren os requisitos para a súa suspensión” e que, por tanto, a nova ordenanza entrará en vigor o mércores 1 de outubro, tal e como estaba previsto tras a súa aprobación no pleno do pasado mes de xullo.
Louzao subliñou en rolda de prensa que “a cidadanía de Compostela tampouco entendería que non entrase en vigor” e incidiu en que se trata dunha medida que busca o beneficio común. A alcaldesa, Goretti Sanmartín, xa adiantara durante a fin de semana que sería este luns cando o Consistorio formalizase a súa resposta tras reunirse coa asesoría xurídica.
A portavoz mostrou a súa sorpresa pola decisión da asociación hoteleira de solicitar a suspensión “sen trámite de audiencia”, lembrando que “unha das cuestións das que máis se queixou durante todo o proceso era a falta de diálogo”. Neste sentido, considerou que se trata dun asunto “que non debía estar xudicializado”, aínda que asegurou o “respecto” do Concello ás resolucións que adopten os tribunais.
“A cidadanía non vai entender que se xudicialice este tema. Agora son as instancias xudiciais as que teñen que indicar o que consideren, e nós respectaremos esa decisión. Con todo, entendemos que non hai ningún motivo para que este mércores non entre en vigor a taxa turística, porque é o adecuado e o correcto para Compostela”, concluíu Louzao.
