A alcaldesa de Santiago, Goretti Sanmartín, confirmou que a asesoría xurídica municipal está a rematar a elaboración das alegacións ao recurso presentado por Unión Hoteleira Compostela contra a implantación da taxa turística. O novo imposto aplicarase a partir do 1 de outubro ás estancias en aloxamentos da cidade.
Sanmartín explicou que a proposta de alegacións estará lista “entre este venres e o luns”, logo dunha reunión celebrada esta semana con representantes da entidade hoteleira para tratar cuestións técnicas.
A rexedora mantivo que o Concello seguirá adiante coa posta en marcha do imposto mentres non haxa unha resolución xudicial contraria. “É lóxico que así se faga”, afirmou, incidindo en que “non se entende este recurso, non é un imposto que se grave aos establecementos, é ás persoas que nos visitan”.
Segundo subliñou, trátase dunha contribución destinada a compensar o “sobreesforzo” que supón para a cidade o incremento de visitantes, especialmente en materia de limpeza e coidado do patrimonio. Lembrou tamén que os importes previstos “son moi modestos respecto doutros sitios, entre 1 e 2,5 euros por persoa e noite”.
