A conselleira de Vivenda e Planificación de Infraestruturas, María Martínez Allegue, anunciou a construción dunha nova senda peonil no municipio de Boqueixón, concretamente no tramo da estrada AC-960 que une Sergude e Rodiño. O proxecto contará cun investimento próximo aos 750.000 euros e ten como obxectivo reforzar a seguridade viaria dos usuarios máis vulnerables, como peóns e ciclistas.
Segundo informou o Concello, a redacción do proxecto está prevista para o outono deste ano, co fin de que as obras poidan licitarse ao longo de 2026. O novo itinerario terá unha lonxitude de 1,3 quilómetros e permitirá conectar estas dúas localidades pola marxe da estrada autonómica.
Allegue destacou que “a Xunta continúa recuperando espazos para as persoas, para que poidan transitar de forma segura; e conectando o noso territorio baixo a marca da mobilidade sustentable e segura”. Esta actuación engádese aos 1,8 quilómetros de sendas xa executados na mesma estrada AC-960, no tramo que comunica A Susana co polígono industrial e A Eirexe.
