O aeroporto de Santiago rexistrou unha perda de máis de 200.000 pasaxeiros (-13,5 %) no primeiro semestre de 2025 en comparación co mesmo período de 2024, o que contrasta co aumento que se anotan Vigo (+14,4 %) e A Coruña (+5,1 %). No tocante ao aeroporto Rosalía de Castro-Lavacolla, os pasaxeiros acumulados durante os primeiros seis meses son máis de 1,5 millóns, un 13,5 % menos. Do total, 1.249.658 tiñan destinos nacionais e 260.414, internacionais.
En canto ás operacións, o aeroporto compostelán rexistrou 12.296 voos, un 6,5 % menos que no mesmo período de 2024. No que respecta só ao mes de xuño, a terminal tivo 310.351 viaxeiros, un 10,4 % menos en comparativa interanual. Pola súa banda, Peinador pechou o semestre cun total de 522.339 pasaxeiros, un 14,4 % máis. No mes de xuño, foron 94.417 pasaxeiros, un 6,8 % menos.
Así mesmo, a terminal de Alvedro computou 631.230 pasaxeiros durante os primeiros seis meses do ano, o que se traduce nun crecemento do 5,1 %. As operacións, un total de 7.949, eleváronse neste período un 13 %. Respecto de xuño, o dato foi de 109.490 pasaxeiros, un 3,2 % máis que en xuño de 2024.
