A Universidade de Santiago de Compostela rematou o exercicio económico de 2024 cun superávit orzamentario de 1,65 millóns de euros, segundo se deu a coñecer este venres durante a sesión do Consello de Goberno. O resultado, atribuído principalmente á execución de proxectos de investigación financiados polo Mecanismo de Recuperación e Resiliencia, marca o peche dun ciclo económico de sete exercicios baixo a dirección do actual equipo reitoral, iniciado en 2018.
Ao longo destes dous mandatos, a USC presentou contas con superávit en seis dos sete exercicios, agás no ano 2020, cando a pandemia da Covid-19 impactou nas finanzas da institución. Dende a reitoría subliñaron o “esforzo importante” realizado neste tempo, duplicando os recursos xestionados en investigación e mantendo unha estrutura de gasto controlada. A universidade apostou pola contención orzamentaria, ao tempo que avanzou na renovación e mantemento das infraestruturas.
Durante 2024, os ingresos totais acadaron os 345,53 millóns de euros, unha cifra que se eleva a preto de 360 millóns se se inclúen os organismos dependentes da universidade. A través do Plan Galego de Financiamento Universitario, a USC recibiu 216 millóns de euros, un incremento do 7,5% respecto a 2023.
En paralelo, a captación de fondos para I+D+i alcanzou os 109 millóns de euros, mantendo a liña ascendente dos últimos anos. O reitorado puxo en valor o labor do persoal investigador e das estruturas universitarias que fixeron posible este nivel de financiamento.
No capítulo de gastos, a USC destinou 120,55 millóns de euros ao persoal docente e investigador, un 5% máis que no exercicio anterior. No apartado de persoal técnico, de xestión e administración e servizos, o gasto foi de 61,39 millóns de euros, cun incremento do 5,69%, que inclúe os custos derivados do desenvolvemento do sistema transitorio de carreira administrativa e do complemento de desempeño.
Tamén medrou significativamente o investimento en persoal vinculado a proxectos de investigación, que supuxo 42,83 millóns de euros, un 10,86% máis ca en 2023. Este aumento responde á incorporación de 75 persoas máis en relación ao ano anterior, consolidando así a aposta pola investigación como un dos eixos fundamentais da política universitaria da USC nos últimos anos.
