O goberno local compostelán acodou hoxe solicitar á Xunta de Galicia unha achega de 2,6 millóns de euros para contribuír ao financiamento dos servizos sociais comunitarios da cidade, servizos aos que o propio Concello destina 3,5 millóns de euros. A maior parte destes recursos está destinada ao Servizo de Axuda no Fogar (SAF).
Segundo un comunicado do Concello, a solicitude feita á Xunta busca obter unha achega específica de 2.621.742,96 euros para os servizos sociais comunitarios básicos, dentro dun orzamento global de 6.265.725,86 euros.
Deste xeito, o Concello comprométese a contribuír con 3.597.840,90 euros, o que representa un 57,42% do custo total do proxecto. Comparativamente, en 2023, a contribución municipal foi de 46,47%, equivalente a 2.167.200,13 euros dun total de 4.664.032,20 euros.
Da cantidade solicitada á Xunta, 2.243.002 euros serán destinados especificamente ao SAF, mentres que o Concello achegará 3.010.673,21 euros a este servizo durante o ano. Isto supón un aumento de 54.140 euros na subvención autonómica e de 1.519.187,13 euros na contribución municipal para o SAF en comparación co ano anterior.
A maiores do SAF, os fondos da Xunta tamén se destinarán a cubrir gastos de persoal e ao fortalecemento dos equipos de traballo con infancia e familias.
Adicionalmente, o Concello aprobou a realización de obras para mellorar o pavimento da Praza Nosa Mercé de Conxo e iniciou os trámites para organizar unha nova edición da Festa dos Maiores, que se celebrará, como é tradición, durante as Festas da Ascensión.
No caso do pavimento de Conxo, o contrato foi outorgado á empresa Francisco Gómez e Cía SL por un valor de 111.522 euros (92.166,94 euros sen IVE), respondendo ás demandas de mellora por parte dos veciños da zona.
FESTA DOS MAIORES
Tamén se aprobou hoxe a contratación para a Festa dos Maiores dos anos 2024 e 2025, cun orzamento de 99.792,00 euros (90.720,00 euros máis IVE de 9.072,00 euros).
O Concello de Santiago ten por costume celebrar esta festa nas instalacións do Recinto Feiral de Amio, ofrecendo un almorzo comunitario seguido de música e baile para promover a convivencia entre as persoas maiores das diferentes parroquias e lugares do municipio durante as Festas da Ascensión.
OUTROS ASUNTOS
Asimesmo, deuse tamén o visto bo ao proxecto técnico para a renovación da iluminación e do peche perimetral sueste do campo de fútbol municipal das Cancelas, cun orzamento de 184.314,92 euros máis IVE e un prazo de execución previsto de seis semanas.
Igualmente, o Concello decidiu adxudicar o contrato para a subministración de equipos de protección persoal (chaquetones e cubrepantalones con arnés) para o Servizo de Extinción de Incendios e Salvamento a Axaton SL, por un importe de 129.240,10 euros (106.810,00 euros máis IVE de 22.430,10 euros).
