O Concello de Santiago ultima a petición de declaración de mercado residencial tensionado, que presentará á Xunta xunto a un plan de medidas correctoras, redactado dentro das competencias municipais. Estas terán dúas liñas principais de actuación: optimizar o parque residencial e aumentar a vivenda protexida.
O concelleiro de Urbanismo, Iago Lestegás, presentou este venres en rolda de prensa estas medidas, que levará á segunda reunión da mesa sectorial o 22 de maio para, despois, realizar os últimos cambios sobre elas. A continuación, a solicitude debe ser aprobada pola xunta de goberno local. Unha vez sexa remitida oficialmente á Xunta, a administración autonómica terá seis meses para resolvela.
En canto á optimización do actual parque residencial, o Concello pretende seguir actuando sobre as Vivendas de Uso Turístico (VUT) e promoverá unha colaboración entre Xunta e municipio para mobilizar a vivenda baleira, entre outras medidas.
Respecto diso do aumento da vivenda protexida, o plan contempla a construción e rehabilitación de pisos municipais e incorporación de vivenda desta categoría no centro urbano. Ademais, a declaración de zona tensionada permitirá á localidade acceder a fondos estatais, segundo contempla a lexislación.
