O Concello de Santiago informou este sábado de que resultou beneficiario dunha axuda de case 290.000 euros de fondos europeos ‘Next Generation‘, xestionados pola Consellería de Medio Ambiente e Cambio Climático e polo Ministerio de Transición Ecolóxica, á que desde o Consistorio tamén se achegará ao redor dun 30%.
Coa liña 1 destas axudas poderá atenderse a actuacións como o servizo de información e control que ven de pór en marcha estes días con medios propios para dar a coñecer as boas prácticas na xestión e separación do lixo.
Con esta mesma axuda, o Concello tamén poderá estender os cartóns de apertura dos colectores marróns a máis de 20.000 fogares. Este proxecto vai relacionado coa nova ordenanza que tramita o Concello e encádrase no obxectivo do goberno local de poder levar a todas as vivendas os cartóns para facer uso do colector marrón.
Para o rural, o Concello conta coa liña 2, que permitirá ampliar os mais de 1.700 composteros que hai nas vivendas e tamén seguir mellorando a xestión das illas de compostaxe. O goberno local reivindicou que Santiago foi unha das primeiras cidades en implantar o quinto colector en 2022.
REDUCIR O CUSTO DO TRATAMENTO DO LIXO
O concelleiro de Sustentabilidade e Servizos Básicos, Xesús Domínguez, defendeu que o goberno seguirá apostando pola redución das toneladas de lixo que non se separa e que chega mesturada a Sogama, xa que o tratamento de cada tonelada incrementarase ata os 108 euros. “Temos que ser capaces entre todos de separar o lixo para reducir o custo do seu tratamento”, apelou.
