Integrantes do sector da limpeza de Galicia realizaron a etapa final do Camiño de Santiago en busca de “un milagre” que lles proporcione condicións laborais “dignas”. Á súa chegada, as limpadoras estenderon unha fregona de 18 metros de lonxitude na Praza do Obradoiro. A mobilización, convocada pola Confederación Sindical de Comisiones Obreras (CC.OO.), partiu do Monte do Gozo, realizando un percorrido que culminou na praza do Obradoiro, baixo o lema irónico ‘na limpeza fai falta un milagre’.
Vestidas cun chaleco morado, portando fregonas e utilizando os caldeiros a modo de tambor, o grupo de manifestantes reclamou, apelando directamente ao concello, a creación dun convenio galego de limpeza “forte e xusto” que garanta os mesmos dereitos e salarios en toda a comunidade. Nesta liña, salientaron que “non son traballadoras de segunda” e é esencial terminar coas desigualdades salariais debidas aos convenios provinciais que, engadiron, permiten diferenzas de ata 3.000 euros anuais entre as provincias galegas. Concretamente, entre Lugo e Ourense con respecto a Pontevedra e A Coruña.
AVANZAN QUE ESTA ACCIÓN “NON SERÁ A ÚLTIMA”
Ademais, puntualizaron, estas diferenzas acentúanse á hora de adxudicar as prazas nos contratos públicos, por iso, trasladaron, “se hai concursos únicos, é necesario un convenio único”. Así, destacaron que o sector da limpeza necesita “un milagre”, pero “non se van a quedar esperando” e finalizaron avanzando que esta manifestación “non será a última”.
